| تبليغات | X |
.......
زامان یولوندا منیم گئت به گئت گونوم دارالیر
عؤمور باغیندا نه وارسا چیچکلریم سارالیر
گل آی محببتیمین یاز یاناقلی اؤز گلینی
بیر آز دا چوخ یوبانیرسان داها قانیم قارالیر
اوزاقلاشاندا گؤروش چاغیمیز بو حسرت اوخون
قویور کمانه وورور کؤنلومو دئشیر – یارالیر
یقین کی سنسیز اوتاقدا عؤمور قوجالمادادیر
ویصالین اوستونه حسرتده قاره کؤلگه سالیر
ویصاله یئتمه لی ییک ، گل یوبانما گول یاناغیم
کی عاشیغین قاپیدا، اینتیظاردا نغمه چالیر
یا قورخورام قوپا توفان بیر آن باغیمدا منیم
بو قورخوردان عؤمرون باغی هئی سولور- سارالیر.
صمد فرضی14/7/88
گله ها ...گل و گئده ها – گئتدی بو دونیا!
چوخ سئودیگیم شاعیریمیز میرزه محمد بخشی ده بو دونیادان کؤچدو....!
بو دونیایا گلیب – گئدن چوخدو، آمما هامی سی شاعیر اولانمازلار، شاعیر اولسالاردا، هامی سی اینسان اولانمازلار. البته بیزیم میرزه محمد بخشی، قاراداغیمیزین قوجامان اینسان شاعیریدی... هیچ شاها – خانا شئر قوشمادان باشی اوجا یاشادی و سسیزجه بو دونیادان گؤز یومدو و اؤزیاشادیغی دیزه کندینده آنا توپراغا تاپشیریلدی، روحو شاد – قبیری نورلا دولو اولسون.
بیری دریا – ده نیز، بیریده بیر داملا سو
هئچه ده ییمزمیش! بیر هئیکل یالان.... بزه دیلمیش بیریالان – یونتولموش بیریالان!
نه گلئیدین نه ده گئدئیدین! کاش قیچین سینایدی ... او یالان قوخوسو وئرن باخیش لارین گیله لرینده ن توکولن تیلیت قان اولایدی! ایچی بوش- شیشیدیلمیش بیر قوووتچاخ! آنجاق پارتلادین .....
تام بیر بوم بوش هاوا .......................................................
سن کیم!من کیم!
سن هارا ! من هارا!
من ده لی دولو بیر دویغو ده نیزی – بیر دوشونجه هئیکلی...آمما سن بیر بزه دیلمیش سوسقون گلینجیک – اویونچاخ......!
هه له اویناداجاخلار .... اؤزونو بزه؛ ویترینلرده بوش یئر چوخدو! اویونباز – اویونچاخ سئون هرزه ال لر و گؤزلر سنی گؤزلور .... سنی اؤرتمک ایسته دیم! سن اؤرتوله سی ده ییلسن ...
سنی سئومک ایسته دیم، سن سئویله سی ده ییلسن ...حئییف او گونلره، سن اولارا یاراشان ده ییلمیش سن! سن منیم یئریمده اه یلشدین ..... حئییف او آنلارا – او قدر ده ییلمیشسن... سن یانیما گلدین –...او سلاملارا ده یمز میشسن! او سایقی لارا یاراشمازمیشسان ... حئییف او گونلر – حئییف او آنلارا !
یوخوما گلدین ... حئییف او یوخولارا! یاشاییشیما جالاندین بیر زهر کیمیمیشسن ... ایندی یوخلوغوندا سانیرام کی کاش اولمایایدین ایندی کی کیمی ... یوخلوغون و اؤلومون کیمی.... کاش اولمایایدین.
...
عؤمرومون دار بوجاغین گیزله میشم گلسن اگر
گؤز یاشیم اوزدن آخیب سیلمه میشم گلسن اگر
گل چاتاق بیز سحره تا بو قارانلیق گئجه نی
نور ساچاق روشن ائده ک بیزده بیر آنلیق گئجه نی
حایاتیمدان گؤتوره ک بیر بو دومانلیق گئجه نی
کونلومه عنوان اولان بیر بو دیوانلیق گئجه نی
ییغاق عومرون ائوینه بیر پالاز اولدوز گؤزه لیم
ظولمتی تا ائلییهک عؤمروده سونسوز گؤزه لیم
قالماسین کونلوم ائوی بیر داها سن سیز گؤزه لیم
داغ داشا دیرماشیرام هر گئجه یالقیز گؤزه لیم
اکیره م خاطیره عؤمروم باغینا گؤزلرینی
اصیل اینسان تاپیرام سیزلاییرام سوزلرینی
یالانو ترک ائدیره م ساخلاییرام دوز لرینی
یاخیرام باغریما عشقینده یانان کؤزلرینی
تا نیشان ساخلاییرام سن سیز اؤتن گونلریمی
سنین هیجرینده صاباحلارا یئتن گونلریمی
گئجه رویاده گؤزوم سنله یاتان گونلریمی
الیم هیجریندن اؤتوب عشقه یئتن گونلریمی
تؤکموشم پنجره لرده جوجه ریب لر بیته لر
سن گلین جن بئجریب باشیوین اوسته اسه لر
گلمه سن خنجر اولوب عؤمرومو آخیر کسه لر
نه اوزاتدین سفرین قالمادی عؤمرومده ثمر
گل گیلن کی گلیشین کؤنلومو آچار تزه لر
ساخلادیم گول باغیمی دوغرویام آخیر بویونا
دؤشه نیب قانلی باخیشلار یئنه نیسگیل یولونا
ائله بیل میریغا یاتیبدی گئجه آج قورد قویونا
ای کی سندن یارانیر هر گئجه شعر و غزلیم
منی ده دعوت ائله بیر تویونا
بو محببت منی تهدید ائله ییر کی باغیرام
ان گئنیش پنجره دن باش اوزادیب من چاغیرام
هانی یوخسان بو داریش دونیادا هئی من باخیرام
گؤز تیکیب یول لارینا حسرتیله من آخیرام
گلمه سن بو گئجه نی جان جگریم دوغراناجاق
بئله بیل کی گؤزلیم حاصل عؤمروم سولاجاق
75 / صمد فرضی
...
دویونجا گؤزونده قالار گؤزلریم
محببت درسینی آلار گؤزلریم
حئیيف سندن قالان محببتلری
آغلییا آغلییا جالار گؤزلریم
سن گئدن یوللارا دؤشه نیب هرآن
آددیم آددیم ایزین یالار گؤزلریم
اوزونو خیالیم گتیرسه گؤرسه
دوروب منی مندن آلار گؤزلریم
توتولار گؤی کیمی اوره گیم سن سیز
حسرت یاغیشینا دولار گؤزلریم
سندن آیری هر گئجه نی هر گونو
تک قورد کیمی یاتیب اولار گؤزلریم
منه بیر توی توتار خیالیم هردن
اوردا سنین یئرین سالار گؤزلریم
یارالی یارالی آرازتک آخیر
آخیر بو عؤمرومو تالار گؤزلریم
77/ صمد فرضی
...
ایستیره م بوکال کلمه لریمله،
بیر اوره ک چکم...
ایچینده داغی،
باغی...
ایستیره م بو کال کلمه لریمله،
بیر اوره ک چکم...
ایچینده یورغونو،
سئوگیسی،
خسته سی،
حسرتی،
ایستیره م بو کال کلمه لریمله،
بیر اوره ک چکم...
ایچینده شه هه ری،
خيیاوانی،
ماشینی،
بازاری،
چرچیسی،
ایستیره م بو کال کلمه لریمله،
بیر اوره ک چکم...
اوشاقلار!
آپارین کاغیذلاردا ، بو ملاردا،
وورون دووار لارا ، قاپی لارا ، مدرسه لره،
هامی لار باخسین...
هامی لار گؤرسون کی
بیر اوره ک
نه قد ر نققاشی توتور!؟
نه قدر نققاشی توتور !؟
صمد فرضي / ۸۲
او پاييز، بو قيش...!
غلامرضا فتحي ورزقان
پاييزاونداكي ساري آتين ميندي، گولريمي باغدا ديرناقلادي، بلكه قارا تاريخيمدن اوغورلاسين؛ گؤردوم چارا قالمادي ،گؤز ياشيملا آرزي توخومون قارا توپراقدا اكديم ،بلكه يازدا جوجه ره ؛ آمما بو قيشين سويوغو، و اوزون گئجه لري، توپراقلاري دوندوردو، جوجه رميش توخوملاري داشا دؤنده ردي. آهيم هاوادا،گؤز ياشيم اوزده،ديليم آغزيمدا دونولار،اربابا ايشلمكدن يورغون ال لريم اوشودو، آغزيما آپارديم هووخوروم ؛سويوق آمان وئرمه دي، اليم ديليمه ياپيشدي، آغيزيمدا دوندو، ياواش – ياواش دوندوم- يئره ياپيشديم . قره ايت لر، آلا كوچوك لر دوره ليييب، هوروشدولر... سونرا اومود تنديرينين ايستيسين اوره كده حيس ائده ركن- قاشديلار .
بو گون، دونسامدا اگر؛گؤز يولونا تيكميشم، بيليرم گونش بيرگون ايشيغين ساچاجاقدير. باهارلا يوردوم، يئنه گول چيچكله دولاجاق. ظولمون رنگي قاچيب- سولاجاق، آغيزلاردادلي سؤزلرله دولاجاق ،عاشيقلار، سازدا سؤز قوشاجاقلار.... مرد اوغوللار نامردين گؤزون اوياجاق.
تا سن گله سن ...
دكتر ابراهيم اقبالي
( آشاغي ديزه)
بير شيشه دير كؤنلوم بو قارا داشلار ايچينده،
يوسيف كيمي غوربتده دير قارداشلار ايچينده ،
يعقوبه تاي آغلارگؤزومون قصرين آغارتديم
بيلقيس اولالي گزمه دير بوياشلار ايچينده،
غم حلقه سي قان كؤنلومو سيخميش ائله بيل كي
سورتولموش عقيق ديرسئچيلير قاشلار ايچينده،
بيلمزسن اگرحاليمي سن ائيله تصور
بير تك يارالي دورنا ياشيل باشلار ايچينده ،
طبعيم ايتيريب قافيه ني نئيله سين آنجاق
كهليك تك ايتيبديرساريشين ساشلار ايچينده،
باغري قارا تك داش ديبينه سيغميشام ايندي
تا سن گله سن يازدا قلم- قاشلار ايچينده ،
سانكي گؤزومون پرده سينه نقش ائله ييب لر
بيرقيرميزي دون قيزگزه خاشخاشلار ايچينده.
بير اوووج ...
باياتي
سجاد حضرتي – بئكوو
من عاشيق، وفا باغلار
بيچينچي جفا باغلار
كول او مردين باشينا ،
نامرده وفا باغلار.
*******
عزيزيم كاساد اولماز
مرد الي كاساد اولماز
يوز نامردين چؤره گين ،
دوغراسان كاسا دولماز.
******
عزيزيم قوزو قوربان
قوش قوربان، قوزو قوربان
مردين بيرجه توكونه،
نامردين يوزو قوربان.
آنا اؤلومو
هاتف بخشي – آشاغي ديزه
گئجئیدی، چوخ سویوخ - چوخدا قورخولو،
سازاخ یئلی تخته قاپینی یئریندن سؤکور،
آیدا، اولدوز تک اوزونه اؤرتوک چکیب،
آتام کیتاب اوخویور دئییر آللاهین سؤزودور،
هامی باخیشینی بیر بیریندن گیزله دیر،
بیرده هامی گؤز یاشینی گیزلینجه سیلیر،
عزراییل آتینی قاپیدا ساخلییب،
او قاپینیدا دؤيمور...!
قونشوموزون ایشیغی سؤنور
بیزیمده ائویمیزین دیره گی اوچور
عزراییل آنامین احتیرامینه
صوبحه تک قاپیدا قالمیشدی
آخی او اؤزوده پئشمان ایدی...
بير اوووج باياتي...
آرال قاراداغلي – دوري
قارا تئلين وار سنين ،
باهارسنين – بار سنين ،
باخچاداكي نارا باخ
سن منيم اول ، نار سنين .
********
آنا، اوره ك سسيمدي
آنا ، تك بير كسيمدي
كيمسه اولوب – اولمادي
آنا ، منيم بسيمدي.
**********
كولكده من ، قاردا من
گئديم قاليم هاردا من
گونلريم خوش گئچسده
ياشاييرام داردا من.
***********
لاي لاي قوزو بالاسي
قوزولارين آلاسي
ياددان چيخماز اؤلونجه
بابكين داش قالاسي.
...
من بیلمزدیم کی
بیرگون
آدیم دیلینده اؤلر،
منیمده گؤردوکلریم- دویدوقلاریم،
بیر گئجه نین یوخوسو کیمی سووولار
من بیلمزدیم کی !
ال لرین اللریمدن،
گؤزلرین گؤزلریمدن،
کوسو توتار...
من بیلمزدیم
هر اسینتیلن اسیب -
هر سئلینتیلن آخارسان...
آنجاق سنین ائله لیگینی دوشونمه دیم،
اؤز بئله لیگیمله چوخ سینسیدیم !
صمد فرضي كرويق
...
یول لار توستو،
بولاقلار آجی،
باخیشلار ساختا،
بو حیات ندیر!؟
بو ظولومات ندیر!؟
قورخورام – قوخورام...
قورخورام-
بو اویونجاقلار!
بلگیمدن آچیلیب-
بلکه کفنیمه ده باغلاندیلار...!؟
صمد فرضي كرويق
«آراز...»
آرازبویو پاسلانمیش دمیر یوللاريندا نه گلن وار...؟نه گئدن...؟
قاتارلاردمیریوللاریندا پاسلانمیش
ائله سون دوراقلارا حسرت... قاتارلار توپ - توفنگ سسینه سوسموش... آرازآنالار اوخشاماسینا،کؤرپه اوشاقلارین خوجالی دا سیزیلداماسینا سوسموش
هئی قارداش... هرگون پانبیق زمی لرینده ن قاتارلارگئدیشینه باخاردیق.
ائله قیش گئدمیش داها پانبیق لارگول آچمیش بوتایدا...داها سیزهئچ گلمه دیز آرازهوسینه گئده ن قاتارلاریم. داها هئچ آرازین اوتایيندا پانبیق زمی لری گول آچمامیش بوایل، قاراباغین کندیلرینده توی سسی گلمیرداها، عاشیغین قاراباغ شیکسته سی، بالابانچینین واغزالی سی،اوشاقلارین لزگی اویناماسی... ائله اجنبینین توفنگینین سسینه سوسموش هئی قارداش... ائله بیلیرسن بایقوش بانلامیش ائولرینده ، داها دوشمن بایراغی اسیرچوروموش شیروانیلر اوستونده... داهامنیم تکین آرازدا حسرت قالیب قاتارلارین سسینه، قاتارلار دمیر یوللاریندا پاس توتاندان، آرازآنالاراوخشاماسینا بوغولاندان، آخارسویداقانلا بویانمیش ائله«ایکی سئوگینین گؤز ياشينا بنزمیش...»
هئی قارداشیم داها بسدیر دئییرلر؛
آراز چیرکین لری یویاجاق،بولاق کیمی دوروآخاجاق ائله اؤزگورلوگه ساری...
پاسلانمیش قاتارلاراؤزگورلوگ (آزادلیق) دولوسو سون دوراقلارا گئده جک لر...ائله قاراباغیمیزا گئده جک لر... ائله قاراباغیمیزا گئده جک لر...
بابک توپراق /بئكوو
آذربايجان
عهدیه وحیدی لیجین
( تورک قیزی)
ائلـه بـاغـلانـميشـام آذربـايـجـانـا
مين كره سويسالار ، سويولمـارام مـن
قـاريشميشـام تـورپـاغينـا داشينـا
ها سئل لر چاغلاسين ،يو يو لمارام من
اومنـه آنـاديـر ، مـن بيـر اولادام
آنـا تـورپـاغيمـدا دئمه رم يـادام
اوره گيـم ايپكـدي ، اؤزوم پـولادام
سينسام ، دوز سينارام اييلمه رم من
«تورك قيزي» اوجالدار شؤهره تين- شانين
يـوردونــا صــاداغــا ائيـلـر جـانيــن
آدي اوستـومتــده دي آذربــايجــانيـن
بـاشقــا بيـر آدلارلا دئييــلمـه رم مـن
...
قوراخلیق ایدی بو ایل ،
هئچ اؤپمه دین کی ...
دوداقلاریم چاتلادی...!
هارای/ 84
...
من ،
بدبختم!
من ،
یازیغام!
... ائله شئر یازیرام ،
ائله اینسانلیغیمی اونودورام !؟
نه بیلیم ...اؤزگورلویومو ،
نه بیلیم...قازاماتدا –
ائله بیر کیشی نی...
79/ بئکوو/هارای
...
منیم ال لریم قابارلار،
شاعیرلرینده بئینی...
بابک نصیرزاده( توپراق)/ بئکوو
چوخونا
عهدیه وحیدی(تورک قیزی)
ورزقان / لیجین
يـقيـن بـو زامـانـي پـول دولانـديـريـر
پـولسـوز ايش لر بوتون ياشدي چوخونـا
وارلينيـن زهـری ، بـال يئـرينـده ديــر
يوخسولون جان دئمه يی ، داشدی چوخونا
قـولـو گوجلـو اولان قورسا مئيدانی
يئـردن دوران اولار اونـون قوربـانـی
كيميـن بـو دونيادا اولسـا ايمـكانـی
باجيدان – قارداشدان باشدي چوخونا
مـرديـن قـايداسيديـر ، هـر يئـره اسمـز
اولا سـخــاوتـی ، ييخــديغيـن كـسمـز
هئچ كيم «تورك قيزين» دان اينجيييب -كوسمز
چـون بـو سـؤزو شيـريـن نوشدو چوخونا.
...
گنجیلیمین رومانی
ساعات بیر1:00
ایندی کندیمیزده قیزلار
اوخولدان - مدرسه دن چیخارلار...
بابک / بئکوو
گؤزلریم گؤزونده
صمد فرضی /۸۳
ورزقان / کرویق
کاش اولا بو ایمکان ای گول قالا گؤزلریم گؤزونده
به له نه منیمده بیرجه بالا گؤزلریم گؤزونده
دؤشه نم من عاشیقانه سنه ائتمه گه تماشا
به یه ده حیات نقشین سالا گؤزلریم گؤزونده
دورام آغلاغان گؤزومله گؤزوون رفینده منده
باخام حسرت حسرت ای گول دولا گؤزلریم گؤزونده
کاش اولا اوتار زولفون چکیله بو کؤنلوم اوسته
بیزه گلسن هر زمان سن چالا گؤزلریم گؤزونده
اوبولوت توتاندا گؤیلر نئجه آغلایار تؤکر یاش
اوره گیم بولوتلارنیر کاش اولا گؤزلریم گؤزونده
گؤزوون نامازی واردیر گؤزوم ائتمسه گر زیارت
ناماز آلتی سال کی شاید قیلا گؤزلریم گؤزونده
هارادیر گئنه عزیزیم گئجه نین بو غملی چاغی
گئدیرسن دوشوب سنیله بولا گؤزلریم گؤزونده
گؤزلریم
صمد فرضی/۷۷
ورزقان - کرویق
دویونجا گؤزونده قالار گؤزلریم
محببت درسین آلار گؤزلریم
حئیف سندن قالان محبتلری
آغلیا آغلیا چالار گؤزلریم
سن گئده ن یول لارا دؤشه نیب هرآن
آددیم آددیم ایزین یالار گؤزلریم
اوزونو خیالیم گیترسه گؤرسه
دوروب منی مندن آلار گؤزلریم
توتولار گؤی کیمی اوره گیم سن سیز
حسرت یاغیشینا دولار گؤزلریم
سندن آیری هر گئجه نی هر گونو
تک قورد کیمی یاتیب اولار گؤزلریم
منه بیر توی توتار خیالیم هردن
اوردا سنین یئرین سالار گوزلریم
بیرشعر رحمتلیک « محمود احمدزاده » دن :
بو نه غمدی یا رب ،منی چولغادی – بورودو
ائتمه دی رحم هئچ ، منی اوزو اوسته سورودو،
نرگیزلریم آچمادی ، گول بنؤشم چورودو
نازین چکدیک لریمی ، منه اغیار ائله دی،
بئش گونلوک بو دونیادا ، دوشموشم نه خییاله
شربت ایچیردیم ، منه زهر اولدو پییاله ،
ساحلده گزیردیم ، غرق ائتدی عمانه
اولمادی نجات ، غرق عمان ائله دی ،
بو فلکین ایشین بیلسه یدیم بئله
هوس ائیله مزدیم ، بولبوله – گوله ،
« احمد زاده » ، سنده تحمل ائیله
فلک سنی ، توپ مئیدان ائیله دی .
محمود احمدزاده
اوزی - ورزقان
...
دلی جه سئومک ،
سئویشمک،
و ساریشماغیمیش...
- بیزیم سئوگیمیز!
داغلاردا ،
ده ره لرده ،
نه بیلیم ؛
کوچه لرده لاپ دلی لیگیمیش...
ائله سونوندا دا ؛
دردلی جه آیریلماق ،
قوپماق ،
و آلیشیب یانماغیمیش او...
هارای/ 83
...
گؤزلریم ، قوربانلیغین ...
اوره گیم ، چیلله لیگین ... !
هئچ خبرین یوخدو سنین ؛
نازینلا دولموشام ...
بوقیشدا ،
بوشاخدادا...
چیچک لنمیشم ،
نازینلا یاشیللانمیشام!
هئچ خبرین یوخدوسنین؛
سئومیشم،
خه یال ائدیب اؤپموشم ...
هئچ خبرین یوخدو سنین
هئچ خبرین یوخدو سنین .
هارای قاراداغلی/۸۶
قوربانلیق
قوربان بایرامی بیرمذهبی بایرام اولسادا ،اونا اؤز میللی عادت و عنعنه لریمیز داها گؤزه للیک باغیشلاییب. حتمن هر کتده و ماحالدا جوره به جوره عادتلرله،بوبایرام قئید اولور یا اولورموش...
آمما بونو دئمه لییم کی بوگون قوربان بایرامی ،بیزیم ورزقاندا و دؤره – برینده ، داها تکجه بیر گون حئیوان باشی کسمه یه ، و اونون اتینی ساتماغا وپای – بؤلوش ائتمه یه چئوریلیب. یادیما گلیر کی اون – اون بئش ایل قاباق ،قوربان گونو کندیمیزین ( بئکووون) بوتون جاماعاتی ،بؤیوک دن – کیچیگه ییغیشاردیلار و قوربانی بیر یئرده کسردیلر ، ائله قوربانین اوره گ قانیندا ، پامبیغینان بوتون اوشاقلارین آلنینا ووراردیلار. قوربان گونو یا بیرگون سونرا ، بوتون نیشانلی و آداخلی اوغلانلار ، اؤز نیشانلیلارینا بیر قوچ قوربانلیق آپاراردیلار ؛ او قوچون کلله سین قیرمیزییا بویاردیلار و باشینا پول باغلاییب ، قیز ائوینه گؤنده ره ردیلر. نه نم دئییر کی کندیمیز سئی کولاندا (سیه کلان دا)، قوربان اولان حئیوانین گؤزونه قاباقجاندان سورمه چکردیلر، و او قوربانلیغی کسمه یه آپاراندا، اونون اوزونه گوزگو( یا آینا ) توتوب،دوعا اوخویا – اوخویا،میناجت (یا موناجات)وئره – وئره ... قوربانلیغی کسردیلر،و اونون اوره گینین قانیندان بوتون جاماعاتین آلنینا ووراردیلار،نییه کی بو قان اونلاری بوتون پیسلیک لردن و بد نظرلردن قوروسون.
۱.
گؤزلریمده ن ،
مینی( 1000) گئچیر...
اوره گیمده ن بیری(1) ...
2.
-اوره گیم،
بیرهاواچالیر
-تیلفونومون زنگی ده
باشقاسینی...
بابک نصیرزاده - بئکوو
...
باخيشين ساختادير
گولوشون ساختا ،
باغيشلا...
من سنه دلي دئمه رم !
داها گئديره م
خوش گلدين دئمه دين
دئمه دين گل ايله ش ...
سؤنگون قاراداغلی
علویق - ورزقان
...
سئیید جبره ییل آغانین قبرینه کیمی ،
فقط بیر زینقیروولو گئچی یه دوشوندوم !
هه له ده یادیمدادی :
بوینوزونا ،
زینقیرووونون سسینه ،
و بیرده مئشه یه ...
هارای/ بئکوو/۸۴
ورزقان
منیم اوره گیمین کوچه لریننن بیرکیمسه کئچدی،
باخیب -
گولوب ...
کئچدی ...
منیم شهریم – منیم وطنیم !
اونون وارسا آلچاق ، اوچوق – پالچیق دووارلاری ،
وار اونون میس دن – قیزیلدان
جانی – اوره گی ...
منیم شهریم – منیم وطنیم !
اونون دونن کوچه لرینن بیر کیمسه کئچدی ...
باخیب-
گولوب ...
کئچدی ...
آزادلیق کئچدی ، قیپ – قیرمیزی دوداقلارینان –
قیپ – قیرمیزی شعارلار کئچدی :
منیم سونگونوم ، منیم سون گونوم !
منیم سون گونوم ، منیم سونگونوم !
منیم شهریمین کوچه لریننن دونن بیر دسته آتلی کئچدی ،
ال لرینده قیلینج ،
کوراوغلو کئچدی ، نبی کئچدی ، بابک کئچدی...
دالیسیجان بوتون قیزیل باشلار کئچدی ، ستارخان کئچدی ،
ائله امیر ارشد کئچدی ...
منیم شهریمین کوچه لریننن دونن بیرکیمسه کئچدی ،
باخیب –
گولوب ...
کئچدی ...
منیم شهریمین « ورزغان » آدی ،
اونون وار باشقا دادی ...
اونو دادانا میننت ، سئونه میننت ،
اییلیب ....
ائله تورپاغینی اؤپه نه میننت !
اؤپه نه میننت !
علیرضا نصیرزاده (هارای)
